Skip to content Skip to left sidebar Skip to footer

NOVAS

O CONCELLO RENOVA O MOBILIARIO DA SALA DE LECTURA DA PARTE VELLA DA BIBLIOTECA MUNICIPAL LÓPEZ CORTÓN

O Concello de Cedeira acaba de renovar o mobiliario da parte vella da biblioteca municipal López Cortón. Segundo informou o concelleiro de Facenda, Servizos Económicos, Ocio e Tempo Libre, Manuel Martínez López, investíronse uns 8.000€ na posta ao día tanto do chan como das mesas e as cadeiras, nunha actuación que fará máis confortable para as persoas usuarias a sala de lectura.

A actuación incluíu o saneamento do vello solo de madeira, que estaba afectado pola couza, e a instalación doutra tarima nova por enriba. Substituíronse tamén as antigas mesas e cadeiras por outras máis cómodas e cun estilo en concordancia coa sala. Manuel Martínez apuntou a importancia de manter nas mellores condicións a biblioteca municipal de Cedeira, cuxa creación data de 1978, e que ocupa un edificio noble no casco vello da vila. Subliñou tamén que a biblioteca mantén activo o sistema de préstamo e a sala de lectura, coas correspondentes medidas de prevención pola crise sanitaria.

Como se recordará, o Concello de Cedeira abordou a finais do ano 2017 unha importante obra de mellora na biblioteca López Cortón, que incluíu a adecuación da súa accesibilidade, coa instalación dun ascensor, e a súa ampliación nun edificio colindante adquirido pola administración local. Acometéronse tamén outras melloras, entre as que estivo a pintura da imaxe de Rosalía de Castro e uns versos do seu poema “Follas Novas” na fachada, unha intervención que contribuiu tamén a poñer en valor o propio edificio e o casco vello cedeirés.

GRUPOS POLÍTICOS E PERSOAL MUNICIPAL DE CEDEIRA FAN ACTIVISMO VIRTUAL CONTRA AS VIOLENCIAS NESTE 25N

Os tres grupos municipais no Concello de Cedeira participaron esta mañá na lectura do manifesto da iniciativa “En negro contra as violencias”, para expresar un ano máis o seu rexeitamento a toda clase de maltrato ás mulleres. Tal como recordou o alcalde, Pablo Diego Moreda Gil, Cedeira está adherida á dita acción colectiva, que funciona ao longo de todo o ano pero que nesta data do 25N intensifica o seu traballo a prol da sensibilización de todos e todas contra o machismo. Neste 2020, dadas as especiais limitacións que impuxo o coronavirus, as accións fanse de xeito virtual, compartindo a mensaxe e as imaxes na web e nas redes sociais do Concello.

O Concello repartiu entre o seu persoal, en establecementos comerciais e empresas, entidades, e en xeral, ao tecido social da vila, camisetas e suadoiros, máscaras e carteis coas verbas “25N Cedeira en negro” e outros lemas da campaña. Aínda que o material quedou escaso para atender toda a demanda, e o goberno local pediu escusas por elo, o interese da veciñanza por apoiar esta acción conseguiu darlle moita visibilidade no municipio.

Os traballadores e traballadoras de mantemento, da oficina de Turismo, de Servicios Sociais, da biblioteca municipal e doutras instalacións municipais fixéronse fotos vestindo prendas negras coa mensaxe “25N Cedeira en negro” que van ser compartidas na páxina do Concello en Facebook, tamén tinguida de loito neste día.

Nun vídeo, que tamén quedará colgado hoxe nas redes sociais do Concello de Cedeira recóllese a lectura do manifesto, no que se asume a “obriga de todas e todos nós de traballar todos os días pola igualdade en todos os ámbitos da nosa vida porque só así seremos capaces de transformar a nosa sociedade”. A mensaxe fai incidencia en que “este 25 de novembro en especial temos que facer máis visible aínda a loita contra a violencia machista, darlles a todas as mulleres maltratadas a visibilidade que lles nega a terrible crise sanitaria que estamos a padecer”.

Link ao vídeo:

O CONCELLO ACOMETE MELLORAS NA PAVIMENTACIÓN E NA ILUMINACIÓN DO CEMITERIO MUNICIPAL

O goberno local de Cedeira adxudicou e ten xa en marcha dúas obras menores para o arranxo do pavimento nas rúas 1 e 2 da parte vella do cemiterio municipal e para a iluminación da zona que comunica cos nichos novos, na que agora non hai puntos de luz. O Concello investirá preto de 23.000€ nestas actuacións, que se van executar de inmediato e van contribuír a facer máis seguro o tránsito polo recinto.

A empresa de construción Prieto Mouriz vai ocuparse do arranxo do chan nos corredores número 1 e 2 do cemiterio. Actualmente o seu estado é moi deficiente e as escorrentías provocan fochancas, o crecemento de vexetación e o deterioro do firme, o que supón un perigo para os visitantes, en especial para as persoas maiores. A actuación vai consistir no levantamento do actual pavimento, a colocación dunha capa de grava e formigón e a posterior aplicación dun novo firme de plaqueta, no que se instalarán sumidoiros para garantir a drenaxe da auga. O contrato é de 17.545 euros, IVE incluído.

Por outra banda, o Concello mercou á empresa Diesfe e por valor de 5.451,12€, IVE incluído, o material eléctrico preciso para que persoal municipal se ocupe de instalar unha axeitada iluminación na zona que conecta o corredor central do cemiterio cos nichos novos, concretamente coa colocación de 26 leds no solo.